Entama esti sábadu la primer "Caravana pola oficialidá"

Esti sábadu 4 de marzu va entamar en conceyu de Llangréu la "Caravana Pola Oficialidá", una iniciativa de la plataforma Conceyu Abiertu pola Oficialidá cola que va intentar llevase'l debate sobre la oficialidá del asturianu a les villes y conceyos de pequeñu y medianu tamañu d'Asturies nes que normalmente nun se celebren otros actos reivindicativos sobre l'asturianu como se fai nes grandes ciudaes d'Asturies. La "Caravana pola oficialidá" nun ye otro qu'una riestra de coches faciendo caravana informativa que va percorrer dende les 11 de la mañana la cuenca'l Nalón entamando pela Felguera hasta llegar a La Pola Llaviana pasando per Sama,
Ciañu, Sotrondio, Blimea y Los Barreros.


Pela tarde, a les 19:00, el Teatru L'Entregu va acoyer l'actu central del día reivindicativu qu'organiza'l CAO, nel que'l colectivu lliterariu "Reciella Mallory" va facer una llectura de poemes y nel que van actuar darréu los grupos Banda Gaites "Rei Aurelio", Agrupación d'Etnografía y Folclore "L'Esperteyu", Carlos Rubiera "Y los del Bosquín", el monologuista Cellero, y los conxuntos "Tuenda" y "Nuberu".

Según s'anuncia dende'l CAO, tanto la marcha de coches pel valle como l'actu postreru nel Teatru de L'Entregu tienen como oxetivos "reclamar la inclusión de la oficialidá de la llingua asturiana nel Estatutu d'Autonomía y facer que los ciudadanos garren conciencia de la necesidá de protexer y dignificar un patrimoniu de toos como ye l'asturianu". La plataforma da anuncia de que la xornada del sábadu va ser la primera de otres asemeyaes que se van desendolcar pelos conceyos d'Asturies.