Entama en Madrid el IV Cursu de Llingua Asturiana

El Centru Asturianu de Madrid entama esti mes de Payares del 2004 los IV Cursos de Llingua Asturiana. Abiertos a tol mundu y con matrícula de baldre, los cursos van empezar el martes 2 de Payares del 2004 de llunes a xueves, cuatro díes a la selmana con horariu de 6 a 9 de la tarde nel llar del CAM na cai Farmacia 2, averada a la cai Fuencarral (metru de Tribunal).

Pa la edición d'anguaño los cursos van centrase en Llingua y Cultura d'Asturies, con niveles d'aniciu y superior.

El Director de los cursos ye Xaviel Vilareyo, miembru de la Xunta Directiva del CAM, profesor capacitáu de llingua asturiana y entamador de los mesmos cursos dende hai tres años. Al final del cursu los alumnos que cumplan los requisitos d'asistencia y aprovechamientu van recibir un titulu avaláu pola Academia de la Llingua Asturiana por 80 hores lectives. Amás de clases presenciales, los alumnos han facer trabayos y actividaes didáctiques complementaries sobre Llingua y Cultura asturiana.

P'apuntase nun hai más que llamar a los teléfonos del Centru 915328245 y 915328281. Los alumnos van recibir abondu material didácticu de baldre y van disponer d'una bona biblioteca circulante n'asturianu, gramátiques, diccionarios y consultes na-llinia per Internet.