Entama a funcionar el portal oficial “Asturias.es”, con parte de los sos conteníos n’asturianu

El Gobiernu asturianu fizo esta mañana la presentación del so nuevu portal institucional "Asturias.es" dominiu que sustitúi al antiguu "princast.es". Amás del cambéu de dirección, l'estragal informáticu a l'alministración autonómica estrena funcionalidaes, diseñu y, como adelantare va un mes Asturies.com, una versión n'asturianu de los sos conteníos que permite facer la navegación interna mandándose por esta lingua, amás del inglés. Los conteníos nestos dos idiomes van siguir enanchándose col pasu del tiempu, mientres que l'idioma pl que se manda'l portal ye'l castellanu.



Los responsables del portal autonómicu espliquen que l'actualización del portal institucional fízose col envís d'apurrir una organización de la información más cenciella afayando l'accesu a la información y cumpliendo colos estándares d'accesibilidá y usabilidá . La información encadármase agora nuna estructura nueva de conteníos, estremando a los usuarios del portal por estayes d'edá, dende neños a xente mayor pasando per discapacitaos o emigrantes, por situaciones de la vida (dende "visitar Asturies" a "trabayar n'Asturies", o acceder por temes, escoyendo ente les estayes de gobiernu d'asuntos sociales, cultura, deportes etc.

El portal desanicia asina les terminoloxíes alministratives más técniques y abegoses pal ciudadanu nun esfuerzu por ser más amañosu.

Con cerca de 10.000 páxines disponibles y más de 50 portales esternos de l'alministración indexaos nel so índiz d'enllaces, el portal "Asturias.es" precisó d'un periodu de prebes nel que 150 usuarios non técnicos punxeron a preba les sos característiques.