Entama a definise'l currículum de la gaita en conservatoriu

Na mañana d'ayeri, na Conseyería de Cultura del Principáu d'Asturies, presentóse la propuesta curricular pa l'asignatura de gaita nos conservatorios. Esta propuesta ellaboróla una comisión de trabayu formada por dellos especialistes en varios campos, ente ellos los gaiteros Flavio Rodríguez y Pedro Pangua como especialistes del instrumentu asturianu más conocíu.

L'inxerimientu de la gaita nes enseñances musicales oficiales ye una revindicación de vieyo y enforma polémica nel mundu de la gaita asturiana. Pa dalgunos sectores la inclusión d'esti instrumentu nos conservatorios, colos sos esquemes d'enseñu, pue dir en contra del calter popular del instrumentu, anque la postura más estendida ente mayoría de los músicos de gaita que ye que'l fechu de la inclusión de la gaita nel conservatoriu diba desaniciar una discriminación pa con esti instrumentu, que merez tar nesti ámbitu educativu. Lo que se presenta agora ye un primer pasu nesi sentíu, y ye una propuesta pal currículum de gaita asturiana nel conservatoriu. La propuesta afita los oxetivos mínimos de conocimientos que tien que tener un músicu pa superar los graos elemental y mediu de gaita nel conservatoriu.

Dende la comisión de trabayu, cola que faló esti diariu quier dexase bien claro que "lo que s'establecen son unos oxetivos mínimos que depués el maestru tien llibertá p'algamar coles técniques didáctiques que prefiera", ello ye, nun s'apauta como hai que dar la clase pero sí se manda qu'oxetivos didácticos se tienen qu'algamar nella.

La propuesta ellaboróla una comisión de trabayu qu'entamó la Conseyería de Cultura convidando a dellos especialistes en temes rellacionaos col enseñu, la música y l'instrumentu. Asina ésta tuvo compuesta por dos especialistes n'ordenación académica, el director del conservatoriu d'Uviéu Manuel Avello, un profesor de vientu del conservatoriu de Xixón y otru del d'Uviéu y dos especialistes en gaita asturiana, como son los gaiteros Pedro Pangua y Flavio Rodríguez, dos nomes bien conocíos nel mundu la gaita y con esperiencia abondo tanto como músicos en dellos grupos musicales como, Llan de Cubel o Ubiña, o nel llabor educativu poniendo clas de gaita na escuela municipal de Nava nel casu de Flavio Rodríguez y en Llanera nel casu de Pedro Pangua.

Darréu de la presentación de la propuesta ábrese un periodu de tiempu de venti díes pa que quien quiera presente alegaciones o propuestes modificaciones al testu. Nesti sen, na presentación, el director del conservatoriu del conceyu d'Uviéu Manuel Avello quixo facer rescamplar que "esti ye'l primer currículum d'un instrumentu que se fai n'Asturies -los curricula de los otros instrumentos vienen fechos dende fuera d'Asturies-, y ye un testu mui completu, más incluso que'l d'otros instrumentos". La propuesta curricular puede consultase na páxina web Educastur del Principáu d'Asturies.