Entama’l plazu de matrícula nos cursos de branu de l’Academia de la Llingua

L'Academia de la Llingua entama güei llunes 22 de mayu'l plazu de matrícula nos sos tradicionales Cursos de Branu, que van celebrase dende'l 31 de xunetu y hasta'l 11 d'agostu en Santantolín d'Ibias.

El plazu de matrícula pa estos cursos de branu va tar abiertu hasta'l 2 de xunu, anque ye normal que les places s'escosen enantes de que remate'l tiempu p'apuntase. La institución, en cualquier casu, va mandase p'atender les peticiones pol orde de llegada de les mesmes, que puen formulase de 9 a 15 hores y de 16 a 19 hores de llunes a xueves y de 9 a 14 hores el vienres. En cuantes a la ufierta de cursos, xunta los cursos elemental y avanzáu de llingua y el de segundu nivel de capacitación en gallego-asturianu, la institución que dirixe Ana Cano presenta tamién los cursos d'afondamientu, centraos na capacitación pa la traducción, les ferramientes informátiques d'aplicación al asturianu, el patrimoniu arqueolóxicu y el mediu ambiente n'Asturies, amás de cursos específicos en collaboración cola Universidá d'Uviéu.

Xosé Antón González Riaño y Pablo Xuan Manzano Rodríguez dirixen estos cursos de branu que se desarrollen en réxime d'internáu na escuela-hogar de Santantolín d'Ibias y que cuenten cola reconocencia oficial de la Conseyería d'Educación del Principáu d'Asturies, siendo l'ALLA "Entidá Organizadora d'Actividaes de Formación Permanente del Profesoráu". Ello afita la reconocencia d'estos cursos dende'l puntu de vista alministrativu, siendo de gran interés pa los currícula del profesoráu d'Educación Primaria y Secundaria del Principáu d'Asturies al contar nos sos méritos.