Entamó la campaña electoral

La campaña electoral entamó a les 12 d'esta nueche. Los grandes partíos políticos fuxeron del agua y del frío dexando les tradicionales pegaes de cartelos por actos zarraos. Asina,la candidata del PP entamó la campaña nun hotel de Xixón, au fizo una presentación virtual, mientres que'l socialista Álvaro Cuesta fizo otru tanto nun hotel d'Uviéu. La pita de la Xunta pola Defensa de la llingua tampoco nun quixo perder esti entamu de campaña, y esperó a la puerte del actu socialista pa volver a presentase énte la plana mayor del PSOE. Los terceros en discordia, Izquierda Xunida-Bloque por Asturies celebraron una fiesta nun baille de Xixón. Con too y con ello, anque los cabeces de llista nun quixeron que-yos chiscare la cola de pegar, les agrupaciones locales entamaron les pegaes nos conceyos, casu de los socialistes de Xixón, qu'entamaron campaña con tola agrupación del conceyu acompañando a l'alcaldesa Paz Felgueroso y la diputada autonómica María Luisa Carcedo. L'agua quitó-yos les ganes de pegar cartelos a munchos, y esta mañana entovía nun ye agobiante, nin con muncho, la densidá de cares de políticos que podemos ver pegaes a les parés pidiéndonos el votu. Queden per delantre quince díes pa ello.