Enrique Castro 'Quini', meyor futbolista de la historia d'Asturies

Pablo R. Guardado y Miguel Fernandi 'Burilo' escoyeron, xunto al públicu presente, el meyor once na historia del fútbol asturiano.

La revista Atlántica XXII entamó ayeri na sala uvieína La Salvaje l'eventu '¿Cuál es el mejor once la historia del fútbol asturiano?, un alderique nel que convidaos y presentes repasaron anéudotes y la trayeutoria de los más destacaos futbolistes de la nuesa historia nun ambiente prestosu. Al final de la mesma, los asistentes votaron cuál consideren el meyor de tolos tiempos, resultando escoyíu Enrique Castro 'Quini', históricu delanteru del Ensidesa, Sporting y Barcelona.

David Remartínez, direutor de la revista asturiana de periodismu d'investigación, moderó l'actu nel que finalmente causaron baxa por causes ayenes a la so voluntá Sita Méndez, presidenta de Femiastur, y María Xosé Martínez, presidenta del Rosa, defendiendo finalmente los sos 'onces' el comentarista de RPA Fernandi y Rodríguez Guardado, redautor d'Asturies.com. Tres pasar pel filtru del públicu, la alineación definitiva considerada como la meyor de la historia del fútbol asturiano foi la siguiente: Esteban; Luis Manuel, Abelardo, César, Cundi; Luis Enrique, Cazorla, Joaquín, Mata; Villa y Quini.

Como entrenador, a pesar de les propuestes de Quirós y Novoa, los presentes aclamaron a Marcelino. Ablanedo II, Castro, Luis García, Javi Fuego, Adrián, Juanele, Tati Valdés, Lángara, Herrerita o Molinucu foron dalgunos de los futbolistes citaos que finalmente nun entraron nel once.

Na semeya, Rodríguez Guardado, Remartínez y Fernandi, al comienzu del alderique.