Enderechando la toponimia

Nun actu que sirve al tiempu pa denunciar la situación de la toponimia nes carreteres asturianes y pa preparar la manifestación pola oficialidá del sábadu (12:30h na Renfe d'Uviéu), l'artista Ánxel Nava, acompañáu d'un grupu de persones representando a toles organizaciones que van participar na manifestación igüó simbólicamente esta mañana un lletreru de carretera a l'altura de San Cloyo, nel conceyu d'Uviéu. L'actu consistió en colocar unes pegatines colos topónimos correchos enriba de les formes acastellanaes de los mesmos, y dexose tamién ellí un escritu col separtáu de la Llei d'Usu en que se reconoz que se rotularan les carreteres colos topónimos na so forma tradicional asturiana.L'actu d'esta mañana vien a facese dempués de que la Guardia Civil detuviere ayeri a tres miembros del Bloque de la Izquierda Asturiana que taben faciendo lo mesmo colos lletreros qu'hai na retonda'l pozu Fondón, a la entrada de Sama. Los responsables del BIA dixeron que amás d'enderechar la toponimia, taben faciendo un serviciu al conceyu, porque los lletreros d'esa retonda taben toos entafarraos de pintura y nun s'entendía lo que traíen puesto.

Contador Estadistiques