Encierru en solidaridá cola neña que nun pue dar asturianu

La protesta de los padres de Catuxa Bermeyu, la neña que nun pue recibir clas d'asturianu nel institutu, dio otru pasu esti fin de selmana. Los padres de l'alumna de IES Monte Naranco y grupu de persones sensibilizaes col casu decidieron trancase esti vienres na sé de la Conseyería d'Educación pa pidir que se-yos atienda. En palabres d'Arturu Xosé Bermeyu, los padres yá nun piden una solución, piden namás que dende la Conseyería se-yos faiga casu y que-yos concedan una entrevista "pa saber a que tenemos qu'atenenos". Arturu Xosé Bermeyu y Dulce Mª Xil, padres de Catuxa Bermeyu, yá metieren el 3 de setiembre un escritu pel rexistru de la Conseyería pidiendo una entrevista pa tratar el casu de la so fía, a la que queríen matricular n'asturianu pero que'l centru empobinó pa clas de francés en cuantes que la llei nun obliga a facer grupu d'asturianu nun habiendo un míniumu d'ocho alumnos que lo pidan.

Como víctima d'esta situación, Catuxa Bermeyu marchó pa casa estes navidaes con una asignatura suspensa, la de francés que-y obliga a dar el centru en cuenta del asturianu, materia que-y imparten los propios padres na cafetería del centru nes hores que los demás neños dan la llingua de Victor Hugo. Anque la familia intentó que'l centru-y ficiere a l'alumna esamen d'asturianu, la directiva del IES ñegó tala posibilidá y obligó a Catuxa a esaminase de francés, asignatura que, evidentemente, agora tien suspensa. Los padres dicen que, hasta que nun s'apañe daqué igua al casu, cuenten con seguir poniendo-y ellos clas d'asturianu a la fía na segunda evaluación a la vuelta de les vacaciones.

Énte esta situación, los padres de Catuxa, que yá ficieron públicu'l casu a los medios de comunicación el pasáu 17 d'avientu, decidieron dar el pasu de trancase na sé de la Conseyería d'Educación hasta conseguir una entrevista, oxetivu que nun pudieron cumplir al echalos d'ellí la policía nun violentu desaloxu. Tres el desaloxu de la sé d'Educación, el garapiellu d'encerraos decidió treslladar l'encierru a les oficines de l'Academia de la Llingua Asturiana, en cuantes qu'institución sensibilizada col tema y tamién órganu oficial dependiente del Gobiernu asturianu. Na sé de l'Alla, los académicos Roberto González Quevedo y Xosé Antón González Riaño recibieron a los encerraos, qu'aguantaron ellí otres 24 hores, hasta les 2 de la tarde del sábadu, en que dieron una rueda de prensa xunta la Presidenta de l'Academia, Ana Cano, quien declaró que "la Conseyería incumple la llegalidá vixente en materia
d'escolarización del asturianu, torgando'l drechu al so deprendimientu
comu asinatura voluntaria y faciendo que l'asinatura de Francés dexe de
ser otativa pa convertise n'obligatoria". L'ALLA solidarizóse asina públicamente cola familia y ufiertose pa evaluar los conocimientos d'asturianu de l'alumna si ello valiere
pa da-y una salida digna al casu de represión llingüística.