Enagás nun va tener que valtar la regasificadora

Asina lo confirma un auto del Tribunal Superior de Justicia de Madrid. EQUO Asturies estudia recurrir esta decisión.

El mesmu xulgáu que declarara illegal la regasificadora l'añu pasáu tres una denuncia de Los Verdes d'Asturies, organización integrada agora n'EQUO, nun ve conveniente'l so valtu ,asina como refuga'l pidimientu pa qu'Enagás devuelva 119,81 millones de euros en compensación polos gastos de construcción y mantenimientu al considerar qu'esti asuntu concretu correspondería a un xuiciu nuevu al non incluyise na demanda inicial. Al respeuto, EQUO esplica qu'esta cuestión nun se dio "porque la decisión de ivernar la planta foi posterior a la presentación de la demanda", dalgo que tamién asocede "cuando se diz que nun se solicitó la demolición na demanda inicial según l'artículu 108 de la Llei de la Xurisdicción Contencioso Alministrativa. Esi artículu aprobóse nel 2015; imposible que nel 2010 s'incorporaren a la demanda".

“Si una construcción nun ye llegal ha de valtase y entendemos que si dalguien se benefició de dalgún tipu de financiación na construcción de dalgo que llega a ser illegal nun se pue beneficiar en mou dalgún d'ello", afirma l'abogáu José Antonio Ballesteros. “Prestaríanos que los máximos interesaos en facer cumplir les resoluciones xudiciales con tolos sos efeutos sían precisamente los tribunales de xusticia y fundamentalmente aquellos del orde contenciosu alministrativo que velen polo público, por aquello de que pertenez a  la ciudadanía. Si se nos entruga si se fixo un bon usu de los recursos públicos, la nuesa respuesta ye non; marafundiáronse recursos públicos por valor de munchos millones d'euros”, añade la lletrada Olga Álvarez García.

EQUO valora agora si recurrir esti autu. Mentes, Enagás ta obligada repetir la tramitación alministrativa, incluyida la declaración ambiental, para llegalizar la planta d'El Musel si quier ponela en serviciu.