Empreses asturianes igüen una llinia de vuelos baratos

La cadena d'hoteles asturiana Celuisma y el grupu inmobiliariu asturianu Mall son los principales accionistes de Asturias Airlines S.A. una empresa nueva que quier conectar l'aeropuertu d'Asturies con delles ciudaes europees, ente elles Frankfurt, Milán, Bruselas, Lisboa o Amsterdam. La llegada a estes ciudaes europees fadríase de manera escalonada, enanchando progresivamente la flota d'aviones y el personal.

La empresa Celuisma, canal hotelera fundada a primeros de los años 80, tien anguaño'l 20% de la empresa de vuelos baratos Air Madrid, qu'echó a andar l'añu pasáu y que conecta la capital española con dellos destinos n'América del Sur, onde Celuisma tien agora mesmo más hoteles que n'España. En Air Asturias Celuisma, propietaria ente otros del hotel Marsol de Candás, pasa a ser sociu mayoritariu col 78% del capital contra'l 20% del grupu Mall, constructor ente otros del Centru Comercial Los Fresnos de Xixón, mientres que'l Grupu Edefa, del que vien el que va ser director de la llinia, Javier Taibo, pasa a tener un 2%,según trescendió a dellos medios de comunicación asturianos. La compañía cuenta con entamar operaciones a primeros del 2006.