Empieza un Debate d’Orientación Política con voz asturianista

Esti xueves 14 principia’l Debate d’Orientación Política. Nél va facese balance del añu llexislativu y de les previsiones del Gobiernu hasta’l final de la lexislatura. Tamién va ser el primer Debate con voz propia del asturianismu d’izquierda.

Según declaró a prensa la Conseyera d’Alministraciones Públiques y Portavoz del Gobiernu, Ana Rosa Migoya, el Gobiernu del Principáu va afrontar el Debate d’Orientación Política faciendo balance de les polítiques desarrollaes nos últimos años.

Tamién se va falar de la situación d’Asturies no que Migoya definió como un “contestu complicáu de crisis internacional mui dura”, anque la Conseyera sorrayó que la situación asturiana “presenta unos índices y unos indicadores que tán n’abondos casos meyor qu’otros territorios” del Estáu español.

El trabayu de Gobiernu hasta’l mes de mayu va ser otru de los temes a analizar y, no cincante a los presupuestos, Migoya dixo que la cuestión “tovía nun ta zarrada nin ellaborada, anque podrá facese dalguna referencia xeneral”.

La voz asturianista
El Debate d’Orientación Política emprímalo’l xueves el Presidente del Principáu, Vicente Álvarez Areces, pero a partir del vienres 15 van intervenir tolos grupos parllamentarios. Nesti sen, va ser la primer vez que la izquierda asturianista tenga voz propia, col diputáu del Bloque por Asturies Roberto Colunga, pa llevar les sos crítiques y propuestes

Rafael Palacios, portavoz del BA, declaró a ASTURIES.COM que nel Debate van criticar la situación qu’atraviesa’l país de recortes sociales y llaborales per parte del gobiernu asturianu y español. Tamién se va facer referencia a cuestiones medioambientales y rellacionaes cola cultura, llingua y identidá yá que, según Palacios, “esiste un abandonu total y absolutu” en temes culturales qu’exemplificó cola decisión sobre Lorient y los actos del Día d’Asturies.

“Hai alternatives y queremos planteales y poneles en marcha”, señaló Palacios destacando que, xunto a les crítiques, tamién Roberto Colunga va plantear unes propuestes polítiques “esperanzadores y qu'aireen la política asturiana”. El llunes 18 debatiránse les propuestes que tolos grupos parllamentarios lleven al Debate.