Emocionante remontada del Sporting

Nuna selmana marcada poles apretures económiques que pasa la entidá, el Sporting llevantó a l'afición de los escaños d'El Molinón pa celebrar la segunda remontada del añu, esta vegada énte'l Pontevedra, tornando lo que yera un 0-2 nun 3-2 nel que foi definitiva la entrada d'Arthuro.

El Molinón vivió ayeri un entreteníu choque ente asturianos y gallegos nel que'l Pontevedra, que se xuega la supervivencia en 2ª, corría munchos más riesgos que'l Sporting. Los futbolistes de Marcelino salieron dominando'l xuegu pero amoriaos en defensa, lo que-y permitió al Pontevedra marcar na primer ocasión enque pisaron l'area sportinguista. Charles adelantaba a los gallegos nel minutu 17, y, anque'l Sporting apertaba n'ataque, cada centru qu'unviaben Juan o Pablo Álvarez acababa disviáu pol efectivu porteru del Pontevedra o paseándose per enfrente de la meta visitante ensin que los delanteros Ismael y Calandria allegaren a la pelota a la rede. Nel minutu 32, el Pontevedra ponía más distancia en marcador al rematar de cabeza Javi Rodríguez un preciosu centru al primer palu de Capdevila.

Colos minutos, el fútbol del Sporting, que practica nesti final de temporada'l xuegu de les rotaciones (ayeri foron titulares Carmena y Javi Fuego) foi centrando, allegándose los asturianos con más peligru a la meta visitante. Asina foi qu'enantes de marchar pal descansu los de Marcelino entamaron a cuayar la remontada con un gol de Neru, que remató de cabeza al fondu de la rede tres d'un centru de Xuan.

El bon xuegu del Sporting siguió nel segundu tiempu, nel que los asturianos disfrutaron d'abondes oportunidaes. Un Xuan mui trabayador unvió un centru qu'Ismael nun precisó de tocar pa qu'entrare a gol, anque cola soentrada despistóal porteru gallegu, poniendo'l Sporting l'empate en marcador. El Sporting taba echáu p'alantre y les ocasiones venién enriestraes una tres d'otra, pero llamentablemente, les pieces del ataque nun acababen de funcionar, sobremanera'l delanteru arxentinu Pablo Calandria, qu'ayeri anduvo un poco faltu de puntería. Nun intre del partíu en que'l Pontevedra aprovechó'l desgaste físicu del Sporting pa llegar un par de vegaes con peligru al área de Roberto, Marcelino dio-y descansu al arxentinu y prebó suerte con Arthuro, dándo-y entrada tamién a Pablo Lago. El brasileñu, faciendo valer la so estatura y xugando con muncha gana, entamó a peinar toles pelotes que-y llegaben, aumentando la sensación de peligru. A la fin, y col cronómetru yá descontando los cinco minutos últimos, el Sporting repitió la xugada del segundu gol del Pontevedra, marcando de cabeza Arthuro un bon centru dende la esquina de Pablo Lago. 3-2 y una remontada que demuestra que'l Sporting xuega meyor cuando nun tien compromisos na clasificación. La permanencia ta cásique afitada no deportivo,agora namás queda que seya igual no económico.