Emilio Llamedo va recibir la medaya de plata d’Asturies a títulu póstumu

El Conseyu de Gobiernu, a propuesta de Francisco Álvarez-Cascos, aprobó l’aniciu del espediente de concesión de la medaya de plata d’Asturies a títulu póstumu a Emilio Llamedo. El presidente del comité organizador del Seya morrió’l sábadu.
 
D’esta forma, el Gobiernu del país quier homenaxear a Llamedo, ún de les persones claves pa entender la Fiesta les Piragües de güei tres permanecer 28 años al frente del comité organizador del LXXV Descensu Internacional del Seya. Sicasí, ésta nun va ser la primer vez que ye merecedor d’esta distinción, yá que nel 2007 el comité que presidía tamién se lo llevó. Enantes, el fundador de la prueba, Dionisio de la Huerta, recibiólu nel añu 1986.
 
Amás, tres la reunión d’esta mañana, diéronse a conocer los nomes de tres secretarios xenerales téunicos y siete direutores xenerales. Éstos son María Isabel Castillo, como secretaria xeneral téunica de Presidencia; Eva Álvarez Torrero, n’Economía y Emplegu; y Pablo Álvarez Bertand, n’Agroganadería y Recursos Autóctonos. Completen el llistáu Miguel Navajas Rebollar, direutor del Institutu Asturianu d’Alministración Pública Adolfo Posada; Rafael Juesas, direutor xeneral de la Función Pública; Ignacio Onís Peral, de Comerciu, Autónomos y Economía Social; Patricia Arce, de Mayores y Discapacidá; Bernardo Martínez Llanos, de Planificación Educativa y Personal Docente; María José Triguero, de Polítiques Educatives, Ordenación Académica y Formación Profesional; Eva María Llera, de Pesca; y Óscar Rodríguez Rodríguez, de Biodiversidá y Paisaxe.