Emigración entama un programa de cursos d'asturianu pa los Centros Asturianos

El Conseyeru d'Asuntos Esteriores Javier Valledor y l'Académicu de la Llingua Pablo Xuan Manzano presentaron esta mañana una nueva iniciativa de l'Axencia Asturiana de la Emigración que va permitir que centros asturianos de tol mundu pongan cursos d'asturianu pa los sos socios.

Los centros d'Alcobendas, Madrid y Valparaiso (Chile) van ser los qu'estrenen esta iniciativa.

El Conseyeru valledor esplicó que la iniciativa enxértase nel programa del Plan de la Emigración Asturiana y agradeció la collaboración de l'ALLA al mesmu tiempu que reconoció la decisión de los centros asturianos a la hora de defender les señes d'identidá asturianes, aspectu nel que los asturianos del esterior demuestren una mayor concencia que los del interior, al paecer del conseyeru.

Nel actu de presentación de los cursos l'académicu Pablo Xuan Manzano esplicó qu'estos cursos yá tienen precedentes con otres actividaes asemeyaes que se ficieron nel centru de Gran Canaria y nel de Montevideo (Uruguay) onde se punxo va dos años un cursu que los integrantes del colectivu uruguayu tan naguando por repetir. En cuantes a la organización y conteníos de los cursos, estos van tener un total de 90 hores lectives y nellos van enseñase les normes ortográfiques del asturianu, la historia y evolución del asturianu, aspectos básicos de sociollingüística y cuestiones sobre la cultura tradicional y moderna asturianes.

Los requisitos pa qu'un centru asturianu pueda facer ún d'estos cursos ye contar con un mínimu de 15 persones interesaes, anque esiste un tope de matriculaos de 25 persones y, lóxicamente, les llimitaciones evidentes de presupuestu y medios humanos pa poner les clases.

La idea ye que, n'acabando los cursos nestos trés centros l'añu qu'entra se faigan otros cinco polo menos, tando l'oxetivu puestu nos centros d'Europa, col envís de facelos en Bruxeles, Lausana y Alicante.

Pablo Xuan Manzano estremó'l perfil de los que s'apunten a los cursinos en dos grupos, d'una parte mozos con estudios universitarios que quieren deprender la llingua de los sos güelos y d'otra pensionistes que son, nos más de los casos, emigrantes de primera xeneración. Manzano faló tamién de lo que tien d'emocionante la esperiencia de poner los cursos pa los mayestros, y refirióse a l'anécdota que-y pasare a elli en Montevideo va dos años, onde hebo alumnos que-y lloraron en clase al sentir falar n'asturianu.