Elecciones n'Escocia y Gales

Cuando n'Asturies ta pa entamar la campaña electoral, otros países celebraron estos díes elecciones a los sos parlamentos. Si la otra selmana dábemos anuncia de les votaciones nel Quebéc, onde los nacionalistes perdíen por primer vez, esta selmana yeren Escocia y Gales les qu'escoyíen por segunda vegada na historia la so representación política nunes elecciones, nes que'l nacionalismu mengüó enforma, sobremanera nel casu galés.

La imaxe del actor Sean Connery sacando bola pa celebrar los bonos resultaos del Partíu Nacionalista Escocés nun va repetise esti añu, y ello ye que'l SNP vien de rexistrar un resultáu malu d'alma, mientres que'l trunfu foi pa los llaboristes, anque la noticia ta na entrada al parlamentu de dos fuerces nueves coles que naide nun contaba: Los Verdes d'Escocia y el Partíu Socialista Escocés, una formación que nun se define como nacionalista pero que sí que ye escocesa dafechu en cuantes que nun ye la rama local d'otru partíu d'ambetu territorial mayor, casu de los llaboristes o los conservadores, ello arriendes de pidir la independencia d'Escocia de la metrópoli.

La entrada d'estos partíos nuevos al parlamentu foi más fácil gracies al sistema electoral que se gasta nes elecciones galeses y escoceses. Esti sistema reparte los escaños al traviés d'un doble sistema nel que conviven el tradicional procedimientu inglés de da-y el escañu al partíu con más votos de cada circunscripción xunta otru segundu recuentu que reparte depués escaños a nivel provincial y nel que tiende a favorecese a los que nun llevaron escaños per circunscripción

Pela so parte, Gales vien de pasar l'afoguín nacionalista que viviere nes anteriores elecciones, les primeres baxo la nueva autonomía del país, qu'estrenaba parlamentu. Asina, el nacionalista Playd Cymru de Gales, que-yos arrampuñare'l trunfu nes anteriores elecciones a los llaboristes nos sos feudos tradicionales, casu del distritu mineru de Rhonda, pierde 12 escaños, anque sigue como segunda fuerza tres los llaboristes, en cuantes que'l Partíu Conservador nun ye a guañar ellí.