Elecciones nel Iraq

Ensin conocese'l recuentu definitivu de los votos nes elecciones del Iraq, tolos países occidentales congráciense de l'alta participación, que s'aitia alredor del 60% de la población, un 90% de los votantes que s'apuntaron pa votar nun censu criticáu enforma por ser parcial y fechu con priesa a partir de los llistaos de cartilles de racionamientu. Celebraes en medio de midíes de seguranza escepcionales que llevaron a la tropa americana ocupante del país a pesllar toles fronteres iraquines, estes elecciones presentábense con un doble significáu. D'una parte yera la primer vegada en cincuenta años qu'Iraq celebraba una votación con partíos distintos. D'otra, pa la potencia ocupante estes elecciones qu'el presidente americanu George Bush calificó de "ésitu" quieren presentase como una llexitimación de l'actuación n'Iraq.

111 llistes se presentaben a estes elecciones estremaes en dellos grandes bloques ideolóxicos, ente ellos los islamistes chiites, los kurdos independentistes y los nacionalistes laicos del actual primer ministru y favoritos de los americanos. Per otra parte, los sunnites, que mandaben el país en tiempu de Saddam, nun aprebaben esta votación, y mandaron boicotiala, espeyando la francedura social y relixosa del Iraq. Los atentaos suicides que los grupos más radicales teníen anunciaos acabaron tamién por facese realidá y mataron amás de 50 persones na xornada electoral.

Los resultaos van tardar en conocese unos cuantos díes, y darréu d'ello va entamar un procesu entovía más lentu pa formar un parlamentu con 275 representantes que tien l'encargu de redactar una constitución pal mes d'agostu, celebrándose p'avientu unes nueves elecciones pa escoyer gobiernu.


La prensa internacional dedíca-y esta mañana tolos sos titulares al asuntu, mientres qu'otra fonte dende la que tener información ye la de los weblogs iraquinos

Más información en: Al Jazeera, CNN, FoxNews, Usa Today
, BBC, The GuardianLe Monde, Liberation.