Elecciones ensin votantes

Cola convocatoria oficial que se fizo'l llunes y na que s'afitó'l 25 de mayu como fecha pa les elecciones a conceyos y a la Xunta Xeneral del Principáu entamó la carrera electoral n'Asturies. 928.774
asturianos y asturianes residentes nel país y otros 57.045
nel estranxero tan llamaos a participar pa escoyer la representación política que gobierne'l país y los ayuntamientos d'equí al 2.007.

Énte les elecciones autonómiques del 25 de mayu somos menos asturianos y asturianes a votar que va cuatro años, y en consecuencia hai menos cargos a escoyer. Dellos de los 78 conceyos asturianos perdieron población abondo de va cuatro años p'acá como pa que-yos toque quitar conceyales de los ayuntamientos. El casu más fuerte ye'l de Mieres y Llangréu, que, al baxar de la barrera de los 50.000 habitantes pierden caún cuatro conceyales, pasando de 25 a 21, anque nun hai qu'escaecer que perdes de población bien ruines puen desarmar ayuntamientos, como en Casu y Villayón, que pierden 2 conceyales caún por culpa de que perdieron 31 y 60 vecinos respectivamente.

Con too y con ello, nun dexa de llamar l'atención el casu de Pezós, onde la mengua demográfica dexó al conceyu con menos de 250 habitantes, lo que permite que Pezós tenga llistes abiertes al ayuntamientu. El procedimientu consiste en que tolos candidatos de tolos partios van dir nuna sola papeleta en que los vecinos tienen de marcar cuatro aspes pa escoyer a los cinco conceyales que faen la cámara municipal del conceyu. Sicasí, hai otru conceyu con menos votantes que Pezós, son los 197 de Yernes y Tameza, que tamién tien que presentar llista abierta. Otros conceyos anden raspiando la barrera de les 250, casu de Santu Adrianu, con 277 votantes apuntaos na llista del INE.