El XXIII Premiu Xuan María Acebal de poesía ye pa Pablo X. Suárez

La obra ‘Little Babilonia’, de Pablo X. Suárez, ye la ganadora del XXIII Premiu Xuan María Acebal de poesía, qu’entrega la Conseyería d’Educación y Cultura dientro de los Premios Lliterarios. El xuráu decantióse por esti trabayu por unanimidá.

Fernando Padilla, direutor xeneral de Planificación Llingüística y Normalización, presidió’l mesmu, que tuvo conformáu polos escritores Raquel Fernández Menéndez, Ana Isabel Medina, Xuan Santori, Xosé Miguel Suárez Fernández ‘Tapia’ y María Ángeles Carbajal, ganadora de la edición anterior cola obra ‘Un vasu d’agua’. L’acta del gallardón destaca de ‘Little Babilonia’ “el nivel llingüísticu y estilísticu, y la brillantez de les imáxenes d’un testu que xuega y entemez la tradición más clásica coles referencies más pop”, trabayu que Suárez presentó baxo’l nomatu de ‘Richard Richmond’.

L’autor d’Orviz, filólogu y especialista en Llingua Asturiana y creador de la Timba Poétika, tien publicaos n’asturianu los poemarios ‘Asturiana Beat’ (2005) y ‘El sistema débeme una chocolatina’ (2011), amás del volume de rellatos ‘Yoni y yo’. Nacíu nel añu 1981, ye la primer vegada qu’algama’l Xuan María Acebal, que cuenta con una recompensa de 3.000 euros.

Con esti fallu, yá se conocen los ganadores de cuatro de los cinco Premios Lliterarios, tando pendiene entovía’l del más veteranu, el Xosefa Xovellanos de novela. Alberto Vázquez García llevó’l IX Alfonso Iglesias de cómic pola so obra ‘Los llazos coloraos’; Santori’l XXIII Premiu Máximo Fuertes Acevedo d’ensayu por ‘42.553: depués de Buchenwald’; y Berta Piñán el X Premiu María Xosefa Canellada de lliteratura infantil y xuvenil por ‘Vida nel campu’.

La entrega de los Premios Lliterarios va celebrase’l 14 d’avientu nel Paraninfu de la Universidá d’Uviéu nuna ceremonia na qu’esti añu se suma’l I Premiu y Festival Nel Amaro de Teatru Profesional en Llingua Asturiana o Gallego-asturiano.