El Xurásicu de Colunga igua los resultaos de los museos asturianos

La Conseyería de Cultura ta acabante de facer públicos los datos de visites a los museos asturianos nel 2004. Según el llistáu oficial, el Muséu del Xurásicu de Colunga valtó toles marques de visites, rexistrando en namás 9 meses de funcionamientu un total de 195.496 visites. Con esti datu, el muséu de los dinosaurios dobla la cifra del Muséu de la Minería, tradicionalmente'l más visitáu d'Asturies a lo llargo de los sos 10 años d'historia y que con 92.520 entraes tuvo una xuba de más de 7.000 visitantes nel 2004 respective al 2003

En tercer llugar entra'l Belles Artes d'Asturies. La institución que dirixe Marcos Vallaure, eternamente pendiente d'una ampliación, rexistró dalgo menos de 52.000 visites. Cuartu nel llistáu y encabezando los museos de Xixón ta'l Muséu Etnográficu - Muséu del Pueblu d'Asturies, anque l'acabante remocicar muséu de la eria del Piles, que nel 2004 tuvo interesantes exposiciones como la que-yos dedicó a los asturianos y la cocina, pierde visites y baxa de74.516 a 47.916.

El quintu puestu foi pal Muséu Casa Natal de Xovellanos, que rexistró 43.201 visites, ello con tar peslláu por obres dellos meses del añu, mientres qu'el sestu puestu ye pal Muséu de la Ilesia, que xubió espectacularmente hasta quedar en 43.050 visites. 36.555 visites asitien al Muséu de la Sidra de Nava como'l sétimu más visitáu d'Asturies, mientres que les sos 28.108 meten nel octavu puestu al Marítimu de Lluanco, qu'estrenó esti añu una sala nueva. El Muséu del Ferrocarril, ún de los que tuvieron un coste más altu de tol país y que s'estrenaron con más visites que nengún otru de la qu'abriere, sigue en cayida llibre, con 24.500 visitantes en tol 2004, una cantidá que lu dexa nun novenu puestu mui probe pa les sos aspiraciones teóriques y que rescampla coles más de 60.000 que tuvo nel so primer añu de funcionamientu, l'entovía cercanu 1999. Pieslla la llista de los 10 primeros museos d'Asturies l'etnográficu de Grandas de Salime con 20.220 entraes

En conxuntu, la rede de 16 museos que controla'l Principáu tuvo nel 2004 un total 648.612 visites, 185.328 más que nel 2004. Ello quier dicir que de nun ser pola apertura del Muséu del Xurásicu y el reblagu de visites qu'aportó taríemos falando d'una perda de cerca de 10.000 visitantes nel conxuntu de los museos asturianos respective al 2003, añu aquel que tamién fuere malu pa la rede asturiana de museos públicos con 31.000 visitantes menos respective al 2002. Cuando se dieron a conocer aquellos datos va agora un añu, dende la Conseyería de Cultura falóse de crear una imaxe de marca que baxo la denominación "Museos de Asturias" enxertaría tola rede d'equipamientos culturales públicos y los particulares que lo desearen, centralizando la vienda d'entraes pa los mesmos y ayudando a xubir la cifra de visites de los museos asturianos. Esta idea nun cuayó hasta agora, y fontes de la Conseyería de Cultura comentaron a Asturies.com qu'entovía nun hai plazos pa concretala.