El xuez reabre dilixencies pola publicación de "Construyendo Asturias"

El Xulgáu d'Instrucción númberu 2 d'Uviéu reabrió, dempués de la presentación d'una denuncia por parte de la formación nacionalista "Andecha Astur" les dilixencies previes qu'abriera va cuatro meses pola publicación y edición de "Construyendo Asturias" una publicación editada a tou color repartida l'añu pasáu pelos buzones de miles d'asturianos y na que se repasaben en clave allabanciosa dellos proyectos llevaos alantre pol Gobiernu asturianu.

Andecha Astur punxera nel momentu de dase a conocer el llibru, que contaba con ediciones distintes pa cada principal ciudá asturiana, les cuenques mineres y les ales del país, una denuncia por un presuntu delitu de cochechu, malversación de fondos públicos y prevaricación. Naquellos díes, el Partíu Popular calificó la edición de los testos de "publicidá tapecida" y Izquierda Xunida pidió que s'abriere una investigación pa descubrir quién taba tres de la edición de la obra, de la que s'atribuyó tola iniciativa y responsabilidá la imprenta "avenida gráfica" de Leganés. El Gobiernu asturianu negare toa rellación cola publicación del llibru y presentó un informe fechu pola intervención xeneral de l'alministración autonómica nel que se conseñaba que nun hubiera gastu de fondos públicos na edición de la obra, que tampoco llevaba la firma del executivu autonómicu.