El xuez llevanta la suspensión cautelar de la carrera profesional pola "gran molestia" que supón pal personal

La sala de lo contencioso alministrativo del Tribunal Superior de Xusticia d'Asturies (TSXA) decidió ayeri llevantar la suspensión cautelar de l'aplicación de la 'Carrera profesional' por entender que "diba xenerar una gran perturbación de los intereses del personal afectáu pola actuación alministrativa impugnada", según consta nel autu xudicial.

El TSXA dictare'l pasáu 5 d'ochobre la suspensión cautelar de l'aplicación de la 'Carrera profesional' en respuesta a un recursu presentáu pola CSI escontra l'alcuerdu firmáu ente'l Gobiernu rexonal y los sindicatos mayoritarios UXT y CC.OO.

L'Alministración asturiana nun recurriera nel plazu de los diez díes previstos l'autu emitíu pola Sala de lo Contencioso Alministrativo nel que, en respuesta al pidimientu de midíes cautelares presentada pola Corriente Sindical d'Izquierdes, suspendíase l'alcuerdu de incorporación de los funcionarios de l'Alministración asturiana a la carrera profesional.

Nel recursu a la suspensión cautelar personáronse FSP-UXT, CC.OO y USIPA, amás de l'Alministración autonómica. Nel citáu recursu, el Principáu y los sindicatos ficieron constar que la suspensión alcordada, de caltenese, "diba afectar gravemente al interés xeneral, perxudicando la decisión alministrativa, concordada cola mayoría de los representantes sindicales".