El xuez deniga restituyir a Arias-Cachero nel Grupu Popular

El Maxistráu del Xulgáu Contencioso-Alministrativu Númberu 5 d'Uviéu, José Ramón Chaves, refugó'l pidimientu del ex conceyal del PP d'Uviéu, José Suárez Arias-Cachero de restitución de manera cautelar nel Grupu Municipal Popular.

Esto pasó dempués de que l'alcalde d'Uviéu lu cesara como conceyal el 30 de setiembre del 2010, argumentando "supuestes irregularidaes en delles contrataciones". Pela so parte, el conceyal espulsáu asegura que la decisión del rexidor foi por "apoyar la candidatura de Francisco Álvarez-Cascos al Principáu".
  
Nel Autu'l xuez caltién que l'ex edil del PP nun perdió la so condición de conceyal, nin sufre una privación de derechos o llibertaes d'entidá, sinón que "simplemente ta nuna situación de non adscritu". Esto ye, sigue siendo conceyal y como tal con plenitú de garantía del nucleu de les sos funciones representatives.
  
Por ello'l maxistráu nun aprecia intereses relevantes en xuegu que permitan suspender la executividá d'una actuación municipal adoptada pol plenu'l 4 d'ochobre del 2010, que s'apoya nun previu acuerdu del Grupu Municipal Popular de 20 de setiembre del mesmu añu.
  
"Nun consta que la decisión del Grupu Municipal fuera oxetu d'impugnación pol recurrente, de manera que si tácitamente aceptó les consecuencies de tal actu, nun pue agora mostrar urxencia la so restitución como conceyal adscritu, cuando nun actuó cola dilixencia propia d'un interés apremiante en xuegu", caltién el xuez.
  
Abstención
Amás, el maxistráu señala qu'Arias-Cachero nun mostró'l 4 d'ochobre del 2010 la so discrepancia cola decisión del Grupu Municipal nin se negó a la so espulsión, sinón que simplemente s'astuvo de "tal votación".
  
"Frente al simple interés del conceyal afectáu en caltenese adscritu ha prevalecer l'interés municipal xunto col interés del partíu políticu qu'acordó la so espulsión", añade l'Autu.