El xuez condena a la sindicalista Beatriz Quirós a una multa de 600 euros por una falta de desobediencia

El xulgáu d'Instrucción númberu 2 de Xixón emitió ayeri condena en contra de la sindicalista de Suatea Beatriz Quirós, obligándola al pagu d'una multa de 600 euros por falta de desobediencia al "oponer resistencia a ser identificada" na protesta d'estudiantes y maestros contra la cesión d'espacios na Universidá Llaboral de Xixón a la empresa Thyssen-Krupp que tuvo llugar el pasáu 16 de xineru, con motivu de la inauguración de laEscuela Superior d'Arte Dramáticu (ESAD). La sindicalista declaró en saliendo del xulgáu, que va presentar recursu d'apelación énte l'Audiencia Provincial y defendió'l so drechu a protestar en cuantes que representantes sindicales, contra la instalación nun espaciu educativu d'una empresa privada.

El xuez absolvió al otru representante de Suatea acusáu pol mesmu delitu, Jesús de la Roza, dalgo que solicitó la mesma fiscalía nel xuiciu, xunto cola retirada del cargu de "insultos contra l'autoridá" a los dos sindicalistes. Quirós afitó que "lo de los insultos ye falso dafechu" y esplicó que la condena nun ye por negase a identificase sinon por retrasase n'enseñar un documentu oficial identificativu. La sindicalista recordó que-y robaren el DNI y que, en cuenta d'ello, tuvo qu'enseñar el carné de conducir. Ello ye que'l fallu xudicial recalca que'l retrasu n'enseñar la documentación ye "prueba de la voluntá de la sindicalista de querer tresgredir el principiu d'autoridá".

Jesús de la Roza, que salió absueltu, declaró que'l resultáu del xuiciu daba una impresión esmolecedora porque-y abulta que "se vistió'l casu pa llevar a Quirós a xuiciu pol retrasu na identificación".