El xuegu de cartes ‘La guerra la xoya’, primer conteníu d’un universu al qu’adientrase n’asturianu

“Ye una mestura ente pseudofantasía y, fundamentalmente, ciencia ficción”, apunta Pablo M. Testa sobre l’universu nel que vien trabayando venti años y que va llevar a dos xuegos y dos noveles. El primeru ye ‘La guerra la xoya’, “un xueguín de cartes que ta ambientáu y contestualizáu como eventu anterior dientro de la narrativa del xuegu ‘Hestories de Seda’”, que va editar xunto con Acuto Xuegos con una campaña en marcha en Verkami.

La estratexa y l’atención son claves en ‘La guerra la xoya’, que cuenta con 10 tipos de cartes con atributos específicos qu’hai qu'igualar o superar, sacante qu’ésta indique otra cosa. Un xuegu billingüe –la carta inclúi información n’asturianu y castellanu– “bastante fácil de deprender y de xugar”, esplica l’autor.

L’oxetivu ye algamar la Lknvas, nome de la xoya, ganando 7 puntos, y pueden participar de 2 a 6 xugadores, cola opción de facelo en trés equipos de dos representando cada pareya a una de los trés bandos: la Protectora Lill, los Tomaricanos y los Siguidores de Nuna. “Val pa tolos públicos y pue sacase la baraxa na piscina, na sablera o nuna nueche colos collacios o colos guah.es. Yo por exemplu xuego cola mio fía, que tien 7 años, o col mio pá, que tien 66”, apunta Testa.

Conteníos billingües

Ésti ye’l primer de los cuatro conteníos del universu que tien na cabeza esti asturianu nacíu en Madrid. Son dos xuegos, ‘La guerra la xoya’ y ‘Hestories de Seda’, y dos noveles, de los que trés yá tan fechos, quedando pendiente por finar el segundu de los llibros.

“Llevo con ello na tiesta dende l’añu 2003, pero cada conteníu foi trescurriendo un poco a la so manera”, rellata Testa. “Por exemplu, el xuegu ‘Histories de Seda’ nel 2014 yera un xuegu de rol. Fíxilu dientro d’esti universu que tuvo mui bona acoyida, y lo qu’intenté facer foi idealu como xuegu de mesa”, añade'l doctor n'Historia.

La narrativa del xuegu taba completa nel 2019, pero un problema con un ordenador obligó-y a reescribila. “Yá ta fecha, lo único que toi faciendo de la narrativa ye tornala al castellanu”, amás d’entamar “partíes de preba tanto n’asturianu como en castellanu”.

Y ye que los cuatro conteníos van tener versión nos dos idiomes. Asina, les cartes de ‘La guerra la xoya’ inclúin testos informativos billingües, lo que “visibiliza la llingua asturiana y ye dalgo interesante pa la reciella yá que por asociación va saber cómo se diz una cosa nes diferentes llingües”.

‘Hestories de Seda’, futuru xuegu con tableru

“Lo interesante d’esti proyeutu ye que los cuatro conteníos tán interrellacionaos ente sí, sacantes ‘La guerra la xoya’, que ye un eventu anterior a la narrativa de ‘Hestories de Seda’. Y los trés conteníos nun sólo tán interrellacionaos ente sí, sinón qu’amás son coetáneos. Ye dicir, el primer accesu que ties a esti universu igual a lo meyor ye una novela y depués ta’l xuegu… Nun son continuaciones, sinón que más o menos too ta pasando al mesmu tiempu”, analiza Testa. “Por dicilo de dalguna manera, son conteníos soberanos pero non independientes”, especifica.

La intención ye que nel 2024 ‘Hestories de Seda’, “ un xuegu con tableru, narrativa, figurines…, bastante más complexu” sía una realidá, pero enantes, n’abril, va tar disponible ‘La guerra la xoya’. Nestos momentos ta en marcha en Verkami una campaña de micromecenalgu nel que los usuarios pueden facese cola baraxa de cartes.

A la venta hasta’l sábadu

A falta de 3 díes pal final, el proyeutu yá recaudó 1.197 euros de los 1.200 necesarios, polo que l’oxetivu yá ta consiguío. Toles perres que se recauden en Verkami con ‘La guerra la xoya’, a la venta por 20 euros, van invertise na realización de ‘Hestories de Seda’, el conteníu más ambiciosu, al que se va poder xugar siguiendo la narrativa o diendo “a puntos de victoria y morrer”.

“‘Hestoria de Seda’ yá ye otru tema. Ye un xuegu que recomendaría que xugara tol mundiu porque ye un xuegu perentreteníu, tien una narrativa grande, con munches trames, con munchos finales, con munches posibilidaes. Ye un xuegu con muncho más conteníu y más complexu”, esplica al tiempu qu’apunta que’l xuegu de cartes “sírvenos un poco pa entrar dientro del famosu universu”. Un universu al qu’adientrase n’asturianu.