El XLV Festival de la Sidra fai a Nava protagonista

|
Presentación XLV Festival de la Sidra

La final del Concursu a la Meyor Sidra Natural celébrase'l sábadu, al igual que la Ruta con pipes na cai, y el d'echadores, el domingu.

Con actividaes dende'l martes, el XLV Festival de la Sidra encara los sos díes centrales. Nava ta viviendo un ambiente festivu al rodiu la nuesa bébora nacional y prepara'l recibimientu de persones de dientro y fuera d'Asturies, como nos tiempos previos a la pandemia.

La orquesta Nueva Banda y el Grupo Da Silva van animar esta nueche y mañana, a les 11.30 hores va haber una preba de sidra y productos llocales na redolada del Muséu de la Sidra. Yá al mediu va desendolcase la gran final del Concursu a la Meyor Sidra Natural d'Asturies y Nava, el más prestixosu del país.

A les 14 hores va celebrase un actu d'hermanamientu de toles sidres d'Asturies na plaza Manuel Uría y pela tarde van comenzar a llegar los sidrotrenes y los autocares a la villa. La esperada Ruta de la Sidra de Nava va principiar a les 21 hores.

El domingu va entamase'l XXXV Concursu Internacional d'Echadores de Sidra, onde acuden los meyores profesionales del país. Yá de tarde, a les 18 hores, va haber espaciu pa los cantares de chigre con un alcuentru coral col Errante y l'Allego, los dos de Nava, y el Capilla de la Torre, de Villaviciosa.

Contador Estadistiques