El Xixón Rural tomo’l Muro San Llorienzo

Los vecinos de les parroquies rurales de Xixón afectaes pol Plan Xeneral d'Ordenación Urbanística volvieron güei a manifestase pel Paséu del Muro de San Llorienzo de Xixón na tercer "marcha verde" convocada por 19 de les 25 asociaciones enxertes na Federación d'asociaciones vecinales "Les Caseríes".

La protesta centróse nesta tercer manifestación na demanda de rempuesta a les más de 3.000 alegaciones que les asociaciones y vecinos particulares tienen metíes per rexistru dende va yá más d'un añu, llamentando'l silenciu del Conceyu nun momentu en que'l procesu alministrativu del PXOU de Xixón ta entrando na fase final.

El PXOU prevé trespasar la llende de la Ronda Sur, carretera de circunvalación de la ciudá que yera nel Plan Xeneral vixente hasta agora, la raya de la que nun podía pasar la edificación urbana, y que prevé tamién un aumentu de la edificación nes parroquies rurales xunta grandes unidaes d'espropiación y d'actuación pa lliberar terrén pa la edificación.

El fechu de que la manifestación se celebrare en feches de branu quitó dalgo d'asistencia, pero ello nun torgó que los vecinos del Xixón rural consiguieren enllenar los 4 kilómetros del paséu del Muru con una bandera verde xigante que batió'l record Guinness. La protesta contó col sofitu de partíos nacionalistes asturianos (PAS, Andecha Astur y Izquierda Asturiana) y de colectivos vecinales de toa Asturies, neto que sindicatos agrícoles y otres organizaciones.

La primera "marcha verde" celebróse en febreru del 2004 y llevó a la cai a más de 6.000 persones. La segunda, dos meses dempués, movilizó a más de 10.000 persones que tomaron el centru de Xixón.