El Xixón Baloncestu presenta un resultáu económicu positivu

El Xixón Baloncestu S.A.D. celebró la so Asamblea Xeneral Estraordinaria, en segunda convocatoria, pues na primera nun s´algamare capital social abondu pa facela. El conseyu d´alministración sacó alantre tolos puntos del orde del día col 100% de los asistentes. Hai de destacar que namái tuvieron presentes ocho accionistes acreditaos, representando al 32,16% del capital social.

El resultáu económicu de la temporada 2003-2004 ufierta un superávit de 288.359,96€. Nesti balance tán contabilizaes les subvenciones del Principáu d´Asturies y del Ayuntamientu de Xixón. Anque los resultaos reales sedríen negativos al facer la cuenta de tesorería. Nesti puntu indicóse que nel exerciciu finó'l pagu del créditu que se tenía cola Caxa d´Aforros d´Asturies y que subvencionaba`l Principáu d´Asturies, pa pagar el canon d´ascensu a l´ACB.


Amás anulóse l´alcuerdu de disolución de la sociedá algamáu na Xunta Xeneral del añu pasáu y decidióse una ampliación de capital al alcontrase en causa de disolución por nun tener capital social abondu según la Llei de Sociedaes Anónimes. L´ampliación de capital aprobada ye por 1.842.120€, p´algamar un capital social de 2.370.284,70€.

Nesta Xunta tamién se tomó l´alcuerdu de nomar conseyeru a Pedro López Ferrer, al producise les baxes nel conseyu de l´anterior presidente, Javier Margolles, y del conseyeru Germán Cabrera. Esti nuevu conseyeru yá venía faciendo llabores de vicepresidente del conseyu dende hai unos meses.

Cuando finó l'asamblea`l Presidente, Félix Baragaño, entamó un alderique colos presentes, informando de delles xestiones que se tán faciendo, asina como del presupuestu pa la temporada d´anguaño y de la fundación del Xixón Baloncestu. Sobre'l presupuestu`l Presidente dixo que los gastos sedríen d´unos 940.000€ y que la delda que la sociedá tien d´otros años ye de 546.000€. Sobre los ingresos apuntó que, por abonaos, taquilles, patrociniu y publicidá, teníen presupuestao alredor de de 530.000€, esperando completar col gabitu del Ayuntamientu y el Principáu.