El votu emigrante afita'l trunfu del PSOE

El votu emigrante confirmó lo que s'albidraba, afitando les diferiencies ente PSOE y PP al favor de los primeros nes tres circunscripciones electorales d'Asturies. La Xunta Electoral Central acabó ayeri sobre les 10 de la nueche'l complicáu procesu de recuentu de les 14.435 papeletes llegaes de tol mundu pa les autonómiques, y que dexaron un resultáu acordies a lo que s'aveza, con 6.707 votos pal PSOE, 4.502 pal PP y 631 pa Izquierda Xunida-Bloque por Asturies.

Repartiendo los votos ente les tres circunscripciones d'alcuerdu a los conceyos d'orixe de los votantes, el resultáu final de la oriental queda col PSOE ganando al PP por 210 votos y el de la occidental con ventaya de 481 pal PSOE, mientres que la central, onde la diferiencia yera de 45 votos la nueche del domingu, acaba con 1.523 papeletes más a la llista socialista que la del PP. Esti resultáu afita'l repartu d'ecaños del domingu, con 22 pal PSOE, 19 pal PP y 4 pa Izquierda Xunida - Bloque por Asturies.

Anque'l votu emigrante caltuvo la tendencia favorable al PSOE, ello nun quitó pa que los populares tuvieren un tantu por cientu de votu un poco mayor del que suelen algamar ente la comunidá asturiana na diáspora, qu'amás de ser una bolsa de votu que nun dexa de medrar, tamién da en cada convocatoria tases de participación más altes. Los emigrantes asturianos con derechu a votu nestes elecciones yeren un total de 52.269, lo que facía'l 5,3% del censu electoral, pero hasta estes elecciones nunca nun se recibieren más de 7.000 papeletes per corréu, colo que pue falase d'una participación histórica.