El vicepresidente Cofiño anula la so axenda oficial al dar positivu

Esti martes rexistráronse 203 contaxos.

El vicepresidente del Gobiernu y conseyeru d'Alministración Autonómica, Mediu Ambiente y Cambiu Climáticu, Juan Cofiño, viose obligáu a anular los actos previstos na so axenda institucional pa los díes próximos al dar positivu nuna prueba PCR de detección de coronavirus SARS-COV-2. El parragués ta aislláu y en bon estáu, coles molesties habituales de la COVID-19.

Ayeri zarróse la xornada con 203 casos nuevos, 110 menos que'l día anterior. Mentes, caltiénse'l mesmu númberu d'hospitalizaos, 153, de los que 133 tán en planta y 20 na UCI.

Hebo que llamentar la muerte de 4 persones, 2 muyeres de 96 y 61 años y 2 homes de 88 y 77. No que va d'andanciu finaron 2.515 ciudadanos cola enfermedá causada pol coronavirus SARS-COV-2.

Na semeya, Cofiño'l llunes na Comisión d'Alministración Autonómica, Mediu Ambiente y Cambiu Climáticu.