El viceconseyeru d’Infraestructures señala que’l ‘tren-tran’ nun ha ser cargu de los fondos mineros

Juan Vega, viceconseyeru d’Infraestructures, dixo esti martes na so comparencencia na Comisión de Fomentu de la Xunta Xeneral que’l ‘tren-tran’ nun ha ser cargu de los fondos mineros. Afirmó que debe pagalu Feve.
 
“Los fondos mineros son recursos adicionales y nun val utilizalos pa sustituyir inversiones que tien qu'executar Feve. Eso con esti Gobiernu acabóse”, señaló Vega na so intervención. El viceconseyeru comentó que’l proyeutu del 'tren-tran', anunciáu pol anterior Gobiernu del PSOE, y que constituyía un aniellu per toda Asturies, incluyóse nos proyeutos a pagar polos fondos mineros “en contra del criteriu de los sindicatos”. Según el dirixente, Asturies lleva gastaos en proyeutos del 'tren-tran' más de cuatro millones d'euros y que’l panorama agrávase teniendo en cuenta qu'esiste un contratu con Feve pal suministru d'unidaes pal trayeutu ente Xixón y Llaviana. Vega esplicó qu'hai proyeutos que suponen un tren “ensin raíles nin catenaria” y con cantidaes importantes que nin siquier tán tramitando.
 
En llinies más xenerales, Vega criticó la herencia recibida del Gobiernu anterior. “Dexaron una alministración abandonada, onde les deudes xorrecen”, señaló Vega, que punxo como exemplu un documentu pol que la concesionaria de la carretera AS-II esixía yá fondos adicionales a los pactaos como condición pa cumplir el contratu, o les hores estraordinaries que se deben a los operarios de les carreteres. Reprochó tamién l'empeñu del PSOE de tornar el tren d'alta velocidá nun tren d'altes prestaciones al renunciar al anchu internacional. Nesti sen, dixo que'l Gobiernu tien previsto actuar “en tolos frentes, incluyíu'l xudicial, pa evitar esa situación y que se siga faciendo'l xuegu al monopoliu de Renfe”.
 
La intervención de Vega interrumpióla'l diputáu del PSOE, Fernando Lastra, que protestó al presidente de la comisión, Gervasio Acevedo (FAC), al entender que la comparecencia yera pa sentir a la conseyera y non al viceconseyeru. Rápido, intervino'l diputáu de FAC, Pelayo Roces, pa pidir que se dexara a Vega terminar cola so vez de palabra y asina foi. La sesión caldióse ante les crítiques de los socialistes frente a la intervención del viceconseyeru d’Infraestructures, que volvió a sufrir interrupciones. Roces llegó a falar de “incontinencia verbal” por parte de la diputada del PSOE Ana Rosa Migoya. “Por favor, de-yos un tranxilium pa que callen”, llegó-y a dicir Roces al presidente de la Comisión n'alusión a los comentarios de los parllamentarios socialistes.