El veranu dexó tres vegaes más galipote que la primavera

La costa asturiana recibió esti veranu tres vegaes más galipote que en primavera, según datos del Principáu
Ente xunu y agostu pañáronse en total 781 tonelaes, anque tamién ye verdá que de xunu (342 tonelaes) a agostu, en que se pañaron 181, la cantidá foi menguando. Ello rescampla en comparanza, por exemplu, con abril, en que namás se recoyeron 50 tonelaes de fuel.

El total de galipote recoyío en tierra y que quedó al cargu de Cogersa dende avientu del 2.002 ye de 4.156 tonelaes, cifra que nun incluye lo que recueye na mar el dispositivu de Fomentu, que yera, a fecha del 31 d'agostu, un total de 850 tonelaes.

Otramiente, Principáu y el Gobiernu central nun s'apauten nel tema del pagu de les ayudes pola marea negro, que l'estáu quier dar namás en conceptu de gastos pol llabor de llimpieza, peritaos en seyes millones d'euros, mientres que'l Principáu reclama pa les comunidaes del Cantábricu un equivalente al "Plan Galicia" qu'ayude a iguar los daños de la marea prieto sobre sectores clave de la economía como'l turismu y qu'ayude a la rexeneración de la costa.