El Vallobín algama un ascensu históricu a Tercera División

L'Universidá d'Uviéu pierde la categoría a falta d'una xornada na que se va decidir otra plaza de descensu, el títulu y los otros puestos pa disputar les eliminatories pa Segunda B.

A falta d'una xornada, que se va celebrar unificada'l domingu a les 18 hores, queda muncho por decidir nuna Tercera División na que va debutar l'añu próximu'l Club Deportivo Vallobín. El club uvieín ganó en Blimea al Club Asturias por 2-4 el sábadu, a lo que se sumó'l día siguiente l'empate del Navarro na so visita al Andés (1-1) y la derrota de la SD Lenense col Nalón (2-1), polo que s'aseguró un ascensu históricu pa un club fundáu nel 1991 que comenzó nesti sieglu a competir en categoría absoluta, algamando nel 2010 el so primer saltu de categoría a primera.

Lo único que yá ta confirmao na categoría ye'l descensu del UD San Claudio y del Universidá d'Uviéu, pendiente de saber cuál será'l tercer equipu qu'acompañe a los dos clubes uvieínos. L'empate ente La Madalena y l'UD Gijón Industrial a un gol ayeri en Santolaya dexa a los de La Calzada nuna situación complicada, yá que tienen que ganar al Condal en casa y esperar que los de Morcín pierdan o empaten nel Estadiu Universitariu.

El Lealtad complícase

L'empate ensin goles del Lealtad nel Nalón Nuevu con L'Entregu, xuníu al trunfu del Marino col CD Tuilla (0-5), faen que'l títulu se complique pa los de Villaviciosa al igualar los dos equipos a 87 puntos. El conxuntu maliayu, únicu de la categoría estatal que nun conoz la derrota, vese obligáu a facer el mesmu resultáu que'l Marino, que recibe al CD Praviano, énte un Llanera que xuega metese nes eliminatories pol ascensu, p'asegurar el campeonatu y el camín curtiu hacia Segunda División B.

Xunto col Llanera, quintu con 70 puntos, lluchen polos otros dos puestos que tán llibres pa los play-offs el Caudal y el CD Covadonga, que sumen 72 y 70 puntos, de manera respeutiva. Los mierense xueguen en Sotrondio col EI San Martín, mentes que los uvieínos reciben al Colunga.

Cuatro equipos pa dos places

En preferente cuatro equipos van lluchar, a les 17 hores del domingu, poles dos places que queden llibres tres l'ascensu del Vallobín. Urraca, con 71 puntos, y Navarro, con 70, ocupen agora los puestos de privilexu, cola SD Lenense y l'Avilés Stadium, con 69 y 68, a la espeutativa.

Los choques qu'han d'afrontar estos clubes son los siguientes: Candás-Urraca, Navarro-Astur, SD Lenense-Berrón y Avilés Stadium-Atlético de Lugones.

Na semeya, campu del Vallobín. Semeya propiedá del Club Deportivo Vallobín.