El V Premiu de Microrrellatos ‘El Hórreo del Carbayedo’ foi pa Pablo Rodríguez Medina

|

‘Pol amor d’una muyer’, de Pablo Rodríguez Medina, llevóse’l primer premiu del concursu de microrrellatos en llingua asturiana que convoca l’Asociación de Vecinos ‘El Hórreo del Carbayedo’. El segundu premiu foi pa Vítor Suárez Piñero.
 
El xuráu del premiu, independendiente a la organización d’esti concursu entamáu pola asociación vecinal avilesina, decidióse pol microrrelatu del entreguín, escritor que tien nel so palmarés dalgunos de los concursos lliterarios más importantes que se faen nel país. Mentes, l’uviedín Suárez Piñero fixóse col segundu premiu cola obra ‘Vaya peles ánimes’.
 
La entrega de los premios va tener llugar nes fiestes del ‘Carbayedo-San Roque’ –del 19 al 22 d’agostu–, dientro del nomáu ‘Llunes d’asturianía’. Va ser a les 20 hores na sede del coleutivu vecinal, asitiada cai Dr. Marañón 16, y nel actu van lleese los dos trabayos ganadores. Amás, nesta xornada dedicada la cultura asturiana, va celebrase nel barriu avilesín el IX Certame d’Escanciadores de Sidra (17.30 hores), va representase la obra de teatru ‘De l’Argentina a La Pola’ (18.30 hores) a cargu del grupu Santa Bárbara y va actuar Vicente Díaz (23.59 hores), ente otres munches actividaes.

Contador Estadistiques