El Turnebís del Tribilín pon imáxenes a los cantares de Pauline en la Playa

La compañía dedicada al teatru de solombres, El Turnebís del Tribilín, va ufrir esti xueves un espectáculu novedosu. Va poner imáxenes a los cantares del grupu xixonés Pauline en la Playa.

Daniel García de la Cuesta y Manuel Santiago López Rodríguez van contar pa esta representación cola participación en direuto de la formación de Mar y Alicia Álvarez, una situación que "posiblemente nun se vaya a repetir", avisen los responsables d'El Turnebís del Tribilín. Asina, van dir poniendo imáxenes con solombres chinesques a los temes qu'interprente les xixoneses, a lo que sumarán "dalguna sorpresa más". La cita va ser a les 20 hores nel Club La Nueva España de Gijón (Sala Cultural CaxAstur Monte de Piedá) y la entrada ye de baldre.

El Turnebís del Tribilín trátase d'una de les poques compañíes nel Estáu que se dediquen de manera esclusiva al teatru de solombres y dende los años 80 lleven protagonizando dellos espectáculos, ente ellos munchos con orixe n'histories procedentes de la tradición oral, como la lleenda del cuélebre de San Llorienzu.