El TSXA falla en contra de la tésis doctoral n'asturianu col votu en contra d'ún de los maxistraos

La sala de lo contencioso alministrativo del Tribunal Superior de Xusticia d'Asturies falló en contra del recursu del investigador Faustino Zapico, al que la Universidá d'Uviéu negare'l derechu a presentar la so tésis doctoral n'asturianu. L'abogáu que lleva'l casu confirmó a Asturies.com que la decisión del TSXA contó col votu en contra d'un de los maxistraos y esplicó que darréu d'esta sentencia va elevase recursu d'amparu énte'l Tribunal Constitucional, onde'l casu podría llevar años en resolvese.

El casu de la tésis de Faustino Zapico vien yá d'abril del 2005, cuando la Universidá d'Uviéu refugó al historiador la solicitú que ficiere pa presentar la so tésis doctoral sobre "El discursu de la periferia: corrientes federalistes y autonomistes n'Asturies". Faustino Zapico, que yá lleere la tesina n'asturianu na Facultá d'Historia, topó al llevar la tesis definitiva a les altes instancies de la burocracia universitaria con un conflictu llingüísticu que saltó nel momentu en que'l doctorandu presentó la memoria pa inscribir la so tesis nel rexistru de la institución. Nuna polémica na que llegó a participar el mesmu rector Juan Vazquez, la universidá enrocóse nel argumentu de que, anque'l títulu de la tesis podía dir n'asturianu, el testu de la mesma había presentase polo menos acompañáu d'una copia en castellanu. Los servicios xurídicos de la Universidá teníense pa ello nel calter de llingua non oficial del asturianu.

L'asuntu trescendió les muries de la Universidá pa llegar al mesmu TSXA, onde'l casu provocó una situación enforma escepcional al dimitir Francisco Salto Villén, xuez encargáu de redactar la sentencia. El xuez, que nun tenía la mesma opinión que la mayoría de xueces del tribunal, decidió retirase y que se nomare un ponente nuevu pa la sentencia. Ello ye que dellos miembros de la sala camentaben que si se-y diere la razón al estudiante, ello crearía un precedente xurídicu pa otros titulaos, dalgo que supondría allegase a un réximen de cooficialidá, colo que quedaría en cuestión la validez del artículu 4 del estatutu d'autonomía.

A la fin, el verdictu final del TSXA foi negativu, dalgo que yá se-y comunicó al abogáu defensor del investigador, qu'esplicó a esti mediu que va interponer recursu d'amparu énte'l Tribunal Constitucional. El lletráu interpreta que la sentencia, redactada por un xuez mozu y poco esperimentáu, ye "penosa y decepcionante" y que fai duldar, pola so redacción, si tán en vigor l'artículu 4 del Estatutu d'Autonomía y la Llei d'Usu. Tamién hai otru puntu anómalu en tol procesu, y ello ye que la sala del TSXA suel refrendar por unanimidá estes sentencies, dándo-y el preste al xuez que les redacta. Ello nun foi asina nesti casu, y, a la hora de votar esta sentencia, hebo ún votu particular en contra por parte d'ún de los maxistraos, concretamente'l del xuez que llevare'l casu en primer instancia, qu'entiende que Faustino Zapico sí tien derechu a facer la so tésis n'asturianu. El casu va pasar agora a manes del constitucional, onde pue tomar años la so resolución definitiva.