El TSXA dexa en manes de la Xunta Xeneral el pagu a la RTPA

El 16 d’avientu va celebrase la votación de la proposición de llei pa devolver a la Xunta'l control sobre les competencies en materia presupuestaria. El TSXA dexó esti llunes en manes del Parllamentu la decisión sobre’l pagu a la RTPA.
 
L’autu emitíu güei pola Sala de lo Contencioso-Alministrativu del Tribunal Superior de Xusticia d’Asturias (TSXA), tres la impugnación del ente públicu de comunicación del alcuerdu del Conseyu de Gobiernu del 4 d’ochobre pol que s’alcuerda la restricción de creitu a la RTPA por valor de 11,3 millones d’euros pa esti exerciciu, especifica que’l presupuestu del ente y les sos sociedades –TPA, RPA y la Productora de Programes (PRODA)– "depende de la Xunta Xeneral del Principáu y ta suxetu a la soberanía de la mesma ensin que tenga competencia dalguna’l Gobiernu del Principáu d’Asturies". Asina, dao que nestos momentos los trés grupos de la oposición aniciaron la tramitación de la proposición de llei pa reformar el testu refundíu del Réxime Económicu y Presupuestariu, la sala estima que "la determinación nun se pue facer nesta fase del procedimientu".
 
El tribunal deniega d’esti mou la suspensión cautelar del 'Plan d’axuste' del Gobiernu que se solicitara, anque almite que la decisión del Executivu "pudiera trayer consecuencies graves na entidá recurrente al nun poder facer frente a los pagos que-y reclamen los sos acreedores y a los salarios de los trabayadores". Sicasí, afirma que la decisión del Gobiernu supón "una mera retención de creitu polo que resta del exerciciu presupuestariu del 2011, ensin que se diga nada sobre la so restitución y reconocimientu para los exercicios sucesivos".
 
El TSXA estima que l’interés xeneral, determináu pola voluntá de mantener l’equilibriu presupuestariu d’Asturies, "prevalez sobre tolo demás", y asegura que l’Alministración retién "aquelles partíes que considera más convenientes y menos pexjudiciales pa la ciudadanía en xeneral". L’ente públicu de comunicación y les sos trés sociedades van recurrir l’autu en reposición ante la mesma sala.