El TSXA da la razón a los prexubilaos d’Hunosa, que van recuperar los complementos impagaos

Hunosa va tener qu’abonar a 6.638 prexubilaos les perres de les pagues que-yos recortó en febreru. El Tribunal Superior de Xusticia d’Asturies (TSXA) falló a favor de los sindicatos, que demanden a la empresa que faiga’l pagu darréu.

La cantidá que cada trabayador prexubiláu perdía al mes yera d’ente 50 y 600 euros, según el casu, con una media estimada en 200 euros. Hunosa xustificó nel so momentu esta decisión al considerar que la Llei de Presupuestos Xenerales del Estáu impide-y aportar actualizaciones a planes y fondos de xubilación. Esta decisión llevó a los sindicatos a movese rápido, llevando l’asuntu  a los tribunales y conovocando tolos miércoles concentraciones frentes a les oficines de la empresa n’Uviéu.

Agora, cuatro meses depués, el TSXA falla a favor de la demanda de CC OO, UXT y la Federación de Cuadros contra Hunosa, la Sociedá Estatal de Participaciones Industriales (SEPI) –aicionista xúnicu de la hullera–, Vidacaixa Seguros y Reaseguros, polo que la empresa deberá d’abonar a los prexubilaos los cerca de 6 millones d’euros que-yos adeuda. Los sindicatos demanden agora que se faiga’l pagu darréu, anque l’asuntu podría llegar tovía al Tribunal Supremu.