El TSXA archiva la querella de Pepe 'el Ferreiro' contra la Conseyera

La Sala Civil y Penal del Tribunal Superior de Xusticia d'Asturies archivó esti vienres la querella criminal presentada por Pepe 'el Ferreiro' contra la conseyera de Cultura del Gobiernu asturianu, Mercedes Álvarez.

L’argumentación ye que los fechos imputaos nun son constitutivos de delitu.
  
Esta querella facía referencia a una espropiación illegal y un delitu contra la propiedá intelectual, pero nun tien nada que ver cola vista que se celebró recientemente, por inxuries y calumnies, que ta tovía pendiente de resolución por esta mesma Sala.
  
Esta denuncia interpúnxola Pepe 'El Ferreiro', a partir de que'l Principáu prohibiéra-y la entrada nel Muséu Etnográficu de Grandas de Salime tres el so cese como director.
  
El Tribunal caltién que'l discutiniu lléndase a determinar la titularidá de les "axendes", dao que la Xunta de Gobiernu del Consorciu, afirma, en contra de lo que caltién el querellante, que formen parte del Patrimoniu Documental del Muséu, cuestión, qu'igual que lo qu'asocede coles pieces espuestes, ha resolvese nel ámbitu civil.