El Tribunal Supremu dexa n’Asturies la Colección Masaveu

El Tribunal Supremu confirmó que la colección de cuadros del desapaecíu industrial Pedro Masaveu Peterson correspuénde-y al Principáu d'Asturies, refugando un recursu de casación que punxere la Comunidá de Madrid contra la primer sentencia de l'Audiencia Nacional que yá reconociere la titularidá asturiana d'esta ablayante colección qu'abarca 420 obres pictóriques de primerísima categoría dende'l renacimientu hasta'l sieglu XX y que tan peritaes en más de 50 millones d'euros. La familia del empresariu decidió dar los cuadros como parte del pagu de los impuestos de socesión, amestándo-yos otros 18 millones d'euros n'efectivo. La comunidá autónoma de Madrid punxo entós un pleitu al atalantar que yera na capital d'España onde teníen de tributar los heriedes de Masavéu por tener ellí'l fallecíu'l so domiciliu fiscal.

El fechu de que l'industrial y inversor tuviere n'Asturies la so primer residencia l'añu enantes de la so muerte, qu'asocedió en xineru del 1993, foi l'argumentu de pesu pa que la colección quedare n'Asturies en cuantes que'l tribunal entendió esti ye'l factor pol qu'había mandase la tributación del impuestu de socesiones, echándo-yos el piesllu a diez años de batalla llegal ente Asturies y Madrid pola titularidá de la colección.

Les obres de Goya, Picasso, Zurbarán, Ribera, Solana, Anglada Camarasa, Romero de Torres y Sorolla son les de más sonadía d'una colección que tamién tien un bon estoyu de cuadros de pintores asturianos, con pieces de Valle,Piñole, Martínez Abades, Paulino Vicente, Telesforo Cuevas, Menéndez Pidal o Suárez Llanos.

Pedro Masaveu yera la cabeza del mayor imperiu industrial asturianu, con presencia en negocios empresariales y financieros de toa triba. La cementera Tudela -Veguín, sétima d'España, ye una de les cabeces del imperiu industrial d'esta familia d'aniciu catalán que s'esparde a participaciones n'Hidroeléctrica del Cantábricu o, nel sector financieru, los bancos Santander, Bankinter y Herrero.