El Tribunal Supremu confirma l’anulación del sistema de nomamientu “a deu” del Gobiernu

El Conceyu por Otra Función Pública n’Asturies (COFPA) dio a conocer la sentencia del Supremu que confirma l’anulación del sistema de nomamientu “a deu” del Gobiernu. Critica que se gastaren perres públiques nun recursu ensin fundamentu.

“La sentencia del Tribunal Supremu qu'agora se conoz pon de manifiestu otra vuelta les illegalidaes nes qu'incurrió l'Alministración autonómica asturiana al utilizar de forma abusiva y xeneralizada la llibre designación, arrequexando´l sistema normal y ordinariu del concursu de méritos. Nel presente casu, creando una nueva categoría de puestos de coordinadores y asesores, inventada  p'aumentar artificialmente los puestos d'enfotu del poder políticu”, señalen dende’l COFPA. Esti determín del muérganu xudicial, de fecha del 15 de payares y notificáu recién, “apuerta firme y dafechu executiva la sentencia recurrida, dictada pol Tribunal Superior de Xusticia d'Asturies el 22 de xunu de 2009, na que se declaraba nulu esti sistema escepcional de nomamientu, envalorando'l recursu interpuestu por trés miembros del Conceyu por Otra Función Pública n´Asturies”, añaden.

Esti coleutivu tamién destaca’l correutivu severu que solmena la sentencia a la defensa lletrada del Gobiernu "al nun contener el recursu crítica xurídica dalguna de la sentencia recurrida" –fundamentu derechu segundu, apartáu cuartu de la sentencia–. “D'esta miente, la declaración del propiu Tribunal Supremu confirma que'l recursu de casación foi una maniobra dilatoria del anterior Gobiernu del Principáu pagada con dineru público de los asturianos y asturianes, a sabiendes de que dichu recursu de casación escarecía de  mínimu fundamentu, col  únicu fin de refugar el cumplimientu inmediatu de la sentencia del TSXA”, critica’l COFPA.