El tribunal ratifica la condena a muerte pa Saddam Hussein

El Tribunal d'Apelación d'Iraq confiró ayeri la sentencia de muerte al ex - dirixente del país Saddam Hussein qu'emitiere'l pasáu 5 de payares y na que lu facía culpable de la matanza de 148 xiites nel añu 1982 nel pueblu de Dujail. La sentencia, que condena a la muerte por aforcamientu, tien d'executase nel plazu de trenta díes. L'abogáu de Saddam declaró que la sentencia yera "política" y resultáu d'un procesu "ensin garantíes xudiciales". En cualquier casu, Saddam tenía otros xuicios pendientes que, casu de llevase alantre'l so axusticiamientu, quedaríen pa prau. El más importante d'ellos rellaciona al reu cola muerte de más de cien mil kurdos a últimos de los 80 en delles campañes militares que se llevaron alantre contra esta minoría étnica.

Mientres se resuelve la condena al so ex - presidente, Iraq sufre una fola de violencia ensin precedentes. Namás esti martes rexistráronse trés españíos en Bagdad nos que morrieron 28 persones. Les muertes de los soldaos americanos qu'ocupen el país alléguense a les 3.000, mientres que'l númberu de civiles muertos dende la ocupación del país que derrocó a Saddam nel 2003 perpasa yá los 50.000.