El Tribunal Constitucional retíra-y al Estáu la competencia sobre los Parques Nacionales

El Tribunal Constitucional resolvió ayeri sobre un pleitu vieyu que punxeren nel 1997 los gobiernos d'Aragón y Andalucía contra una llei del Gobiernu del PP y que ponía en discutiniu que l'Estáu tuviere competencies na xestión de los Parques Nacionales. La sentencia definitiva apauta que namás les Comunidaes Autónomes tienen autoridá na xestión d'estos espacios.

La decisión del Tribunal Constitucional recibióse con satisfacción nel Ministeriu de Mediu Ambiente y nes Comunidaes Autónomes, pero nun tien el preste de los grupos ecoloxistes, que ven nel fallu un "güelpe mortal" a la rede de Parques Nacionales. Ente estos grupos ta'l Colectivu Montañeru Pola Defensa de los Picos d'Europa, ún de los grupos representantes nel Patronatu y Comisión Permanente del Parque Nacional de los Picos d'Europa

El grupu que dirixe Avelino Cárcaba cuestiona en primer llugar el calter contradictoriu d'esta sentencia col de la qu'emitió'l Tribunal Constitucional nel 1995 y que supunxo'l cambéu hacia una xestión compartida ente les CC. AA. y l'Estáu, que tenía hasta esi momentu la competencia esclusiva sobre los parques. Pero aparte de cuestiones llegales, pal Colectivu Montañeru la sentencia afecta más gravemente al parque Nacional de los Picos d'Europa, que ye l'únicu onde la xestión ye compartida ente delles autonomíes (Asturies, Cantabria y Castiella y Llión). Ello va significar que'l parque va tener trés xestores distintos y que caún d'ellos va aplicar nel so territoriu les polítiques que-y abulten más afayadices en cada materia, cosa que, al paecer de los grupos ecoloxistes pue producir un tracamundiu bien grande na xestión de les especies amenazaes o les infraestructures. En concreto, ún de los temes que más preocupen a los miembros del Colectivu Montañeru ye la cuestión de la caza deportivo en parque, una actividá que defende Castiella y Llión mientres que les otres dos comunidaes refuguen

El Colectivu Montañeru alcuentra "decepcionante" la postura de la Ministra de Mediu Ambiente, que dixo que taba "satisfecha" cola sentencia, cuando, según ellos, el determín xudicial namás va traer problemes pa los parques pola cantidá de criterios contradictorios polos que van mandase d'agora en p'alantre y pola perda de credibilidá énte organismos internacionales qu'ello va llevar arreyao. La "satisfacción" de Cristina Narbona abúlta-yos entovía más difícil de pasar a los conservacionistes cuando la mesma ministra se pronunció, va poco, al favor de la xestión compartida del parque.