El tresporte pon el 7% de la contaminación n'Asturies

El Departamentu de mediu Ambiente de la Confederación
Sindical de CCOO y la edición en castellanu de la revista WorldWatch presentaron esta mañana el desglose d'emisiones de gases contaminantes por Comunidaes Autónomes n'España, complementu al informe sobre emisiones contaminantes a l'atmósfera nel Estáu Español que se presentó en xunetu y que demostraba qu'España taba separtándose de lo que manda'l Protocolu de Kyoto, reexistrándose una xuba del 38% nes emisiones de gases d'efectu invernaderu (GEI) nel periodu 1990-2.002.

Joaquín Nieto por CCOO y Joaquín Santamarta por Worldwatch presentaron esti nuevu informe qu'entama presenando la fola de calor d'esti veranu como un anticipu de lo que va ser el cambéu climáticu. Según los datos de CCOO y Worldwatch, lestemperatures del veranu mataron n'Europa a 30.000 persones, 15.000 d'elles en Francia, onde hubo un debate social mui fuerte sobre esti asuntu. CCOO y Worldwatch espliquen que hastaagora namás presentaben l'informe col total de datos del estáu, pero que les condiciones especiales d'estiañu y la xuba tan fuerte de les emisiones encamentaron la preparación d'un informe por Comunidaes a oxetude que los gobiernos autonómicos se sensibilzaren col problema

No que cinca a Asturies, l'informe déxanos nun llugar detacáu na emisión de gases d'efectu invernaderu. Por cuestión de tamañu, evidentemente, Asturies nun ocupa un puestu mui altu en términos d'emisiones absolutes o total de tonelaes de gases vertíes a l'atmósfera, pero porcentualmente, Asturies punxo nel 2.002 el 8,09% de los GEI estatales. Rellacionando les emisiones a l'atmósfera colos indicadores económicos, l'informa tamién apunta que la comunidá asturiana ta a la cabeza n'emisiones en rellación al PIB

Ente 1990 y 2.002 l'informe diz que les emisiones de GEI xubieron el 20,23% n'Asturies, penriba de lo que marca Kyoto pero perbaxo de la media estatal.

L'informe separta rigurosamente los datos d'emisiones por sectores industriales, siendo la estaya d'enerxía y tresporte la que fai'l 87,7% del total. Dientro d'esta estaya, les centrales térmiques ponen el 60% del total, mientres que'l tresporte ocupa'l 7%, sorrayando l'informe qu'esti sector tuvo una xuba d'emisiones de GEI del 68% ente 1990 y 2002. Los escapes de gas de los pozos de carbón faen otru 7,6%, mientres que les industries cementeres químiques y del metal aportaron el 6,7%, un tantu por cientu mui superior a la media del estáu nesti sector.

Agricultura y ganadería punxeron otru 4% del total y los residuos el 1,4%.

Los datos de CCOO y Worldwatch actualicen los del inventariu oficial d'emisiones de gases d'efectu invernaderu del añu 2.001 que presentáremos n'Asturies.com nel mes de setiembre. Según l'inventariu oficial, la nuestra comunidá emitió nel 2.001 el 8,2% del total de los gases causantes d'efectu invernaderu del Estáu, siendo la quinta CCAA más contaminante tres de Cataluña, Andalucía, Cataluña, Castiella y Llión y Galicia. L'informe de CCOO y Worldwatch emplega les mesmes fontes que l'inventariu oficial del gobiernu, pero suel espublizase unos meses primero.