El tren va llegar a Cabueñes

La ministra de Fomentu, Magdalena Álvarez, presentó ayeri col Presidente asturianu Vicente Álvarez Areces, y l'alcaldesa de Xixón, Paz Fernández Felgueroso, el remocique del proyectu del túnel del Ferrocarril en Xixón, conocíu tamién como Metrotren. Les mayores novedaes son que'l tunel, previstu de mano pa los trenes de la Renfe, van poder usalu tamién los trenes de vía estrencha de FEVE y que lavía que diba morrer en Viesques va llegar agora hasta l'Hospital de Cabueñes.

L'anuncia del Ministeriu da-y un reblagu a una de les mayores obres d'infraestructures en Xixón, que llevaba parada más d'un mes.

El tunel espurríu va tener tamién otru repartu d'estaciones, con terminal nel hospital de Cabueñes, nel campus de la Universidá, na Plaza l'Humedal y una gran estación intermodal pa la parte de La Braña, onde ta la estación actual que s'inaugurare nel añu 1989. Según dixo la ministra de Fomentu, el sobrecoste de facer el túnel más llargu y poner más estaciones, anque ye ceo pa peritalu nuna cifra concreta, va asumilu dafechu'l Gobiernu del estáu.