El trabayu interdisciplinar centra una Sestaferia Educativa pal profesoráu d'asturianu que completó les 120 places ufiertaes

|
Xosé Antón González Riaño na X Sestaferia Educativa

Un añu más La Felguera acueye la Sestaferia Educativa, que nesta edición, la décima, completó’l tope de 120 inscritos pa presenciar les charres teóriques que se tán desenvolviendo y participar nos talleres previstos pa pela tarde. Esta xornada formativa dedicada al profesoráu de Llingua Asturiana y Gallego-asturiano céntrase nesta ocasión nel trabayu interdisciplinar.

El Teatru Nuevu foi la sede de les actividaes matutines, un total de seis intervenciones. La primera foi ‘¿Qué ye una Situación d’Aprendimientu?’, a cargu de Xesús A. Vicente y Ástor Llaneza, pa siguir con ‘La DUAula de Llingua’, por Maite Duarte.

Depués d’una posa, Nuria García Álvarez faló de ‘Coeducación: enseñar con perspeutiva de xéneru’, Laura Prieto de ‘Vivencies. Un proyeutu d’ApS interxeneracional’ y Pablo A. Quiroga de ‘De les aules al mundu. Usu de RRSS’. Peslló esta primer parte del programa Xosé Antón González Riaño cola conferencia ‘Instrumentos d’evaluación nel aula de Llingua Asturiana’.

Previamente, el direutor xeneral d’Ordenación, Evaluación y Equidad Educativa, David Artime; Xuan Santori, del Serviciu de Ordenación Académica y Evaluación Educativa de la Conseyería d’Educación; y les conceyales d’Educación y Cultura, Pamela Álvarez, y de Participación Ciudadana, Sara Fernández, participaron na inauguración institucional. Artime declaró que la conseyería tien “la responsabilidá” d’asegurar que les alumnes y alumnos d’asturianu y gallego-asturiano “pueda aprovechar tolos medios, estímulos y canales pa deprender”, y qu’una manera de materializalo ye “sofitar al profesoráu de llingua con iniciatives como esta décima sestaferia, enfocada a dar una visión completa de les situaciones d’aprendizaxe”.

120 maestres y maestros, el tope, apuntáronse a esta xornada entamada pola rede Asturias Formación del Gobiernu, al traviés del Centru de Profesoráu y Recursos Cuenques Mineres y en collaboración col Serviciu d’Ordenación Académica y Evaluación Educativa. Los oxetivos d'esta edición son conocer estratexes de deprendimientu nes clases de Llingua; adautar la programación de Llingua Asturiana a la llexislación nueva; aplicar los principios DUA nel enseñu de Llingua Asturiana y Lliteratura; introducir los ODS y la coeducación nel aula de Llingua; ufiertar un averamientu, al traviés de talleres, a enfoques pedagóxicos interdisciplinares; y presentar modelos de Situaciones d'Aprendimientu.

Actividaes vespertines

Pela tarde, a les 16 hores, les maestres y maestros de Primaria van dirixise a Valnalón pa participar nel taller de Situaciones d'Aprendimientu, mentes que los de Secundaria van dalu nel CPR Cuqneus Mineres. Pa finar, a les 18 hores nel salón d'actos del CIFP de Mantenimientu y Servicios a la Producción van pones en común les esperiencies, la entrega de premios y el pieslle institucional.

Na imaxe, un momentu de la intervención de González Riaño. Semeya obra d'Inaciu Galán.

AdxuntuTamañu
PDF icon Programa X Sestaferia Educativa91.08 KB
Contador Estadistiques