El tiempu históricu de la música asturiana vistu por Ismael González Arias

La editorial Ámbitu espubliza un llibru que sirve d'observatoriu
cronolóxicu a la evolución de la música n'Asturies a lo llargo de más de 1.000 años. L'escritor Ismael Mª González Arias ye'l responsable d'esti
interesante trabayu.



Son munchos los campos y formes que queden por estudiar no que cinca
a la música n'Asturies. Xente, ganes y daqué de sofitu ye lo que
necesita la xera investigadora n'Asturies. Pero tamién necesita de
testos como esta Cronoloxía de la música asturiana, acabante d'espublizar
por Ámbitu. Esti
pequeñu estudiu amuesa, en forma d'una rellación comentada de
feches, los momentos importantes de la historia de la música n'Asturies a lo llargo de más d'un mileniu.
D'esta manera, la obra entama nel sieglu IX cola primer representación d'un
instrumentu musical n'Asturies, un llaúd de siete cuerdes qu'apaez representáu na ilesia San Miguel
de Lliñu. Col pasu del tiempu nes fueyes del llibru podemos dir viendo
datos más exactos sobre les efemérides de la música
n'Asturies acompañaes d'unpequeñu comentariu hasta llegar a l'actualidá. Ello ye que no cabero del llibru
Ismael González yá nos fala
de lo qu'aconteció na música asturiana nel 2004, dándo-y un repasu
bastante completu a la nuestra historia musical nel sieglu XX.