El terremotu de Murcia marca l’axenda eleutoral de los partíos n’Asturies

La desgracia vivida ayeri en Murcia pol terremotu de 5,1 na escala Richter con epicentru en Lorca –precedíu d’otru de 4,4– que provocó al menos 9 muertos, decenes de firíos y daños cuantiosos n’edificios, marcó l’axenda eleutoral de los partíos asturianos esti xueves. Dalgunos optaron por suspender tolos actos de campaña, mentes qu’otros siguieron cola so actividá ensin escaecer a los afectaos pol seísmu.
 
Unión URAS-PAS, Izquierda Xunida-Los Verdes d’Asturies, Ideas, PSOE, PP y UPyD son dalgunes de les formaciones que decidieron parar en forma de llutu poles víctimes mortales de Murcia. Foro Asturias Ciudadano (FAC) tomó la mesma decisión qu’estos partíos, anque a primer hora de la mañana’l so candidatu, Francisco Álvarez-Cascos, protagonizó un paséu peles cais d’Uviéu pa pidir el votu.
 
Otres fuercies, como Bloque por Asturies-Unidá Nacionalista Asturiana y el Frente de la Izquierda, continuaron cola campaña tres mostrar el so pesar polo asocedío en Lorca. “Como nun podía ser d’otra forma, treslladamos el pésame y el dolor poles persones muertes en Murcia nel terremotu, como aprovechamos tamién pa treslladar el pésame y el dolor poles persones que van morrer güei trabayando en delles partes del Estáu español, y treslladamos el nuesu pésame y dolor polos cientos de miles de persones que van morrer güei frutu de la inxusticia social nel mundu. Y lo vamos facer como lo fadrán millones de trabayadores del Estáu español. Pues rendir un homenaxe a eses persones que morrieron, trabayando, desarrollando les nueses llabores y responsabilidaes y, nos actos que faigamos treslladaremos el dolor y dedicaremos un momentu para reflexonar sobre esta dura situación”, señaló Yolanda Huergo, vocera de Bloque-UNA y númberu dos de las llista pola circunscripción central, nuna rueda de prensa pa presentar les propuestes en materia de vivienda y ordenación del territoriu de la coalición nacionalista.