El tercer anteproyeutu de la Llei Wert tien en cuenta la situación del idioma y dexa la pelota nel teyáu de la FSA

|

El Gobiernu decidirá qué papel va tener l’asturianu nel sistema educativu cola entrada de la Llei Wert. El tercer anteproyeutu de la LOMCE dexa güecu a les llingües non oficiales con reconocimientu xurídicu y presencia na educación.

Según información aportada pol Sindicatu Unitariu y Autónomu de Trabayadores de la Enseñanza d’Asturies (SUATEA), la Conseyería de Cultura, Educación y Deporte será, tres esta modificación, la que decida qué posición va ocupar la materia de Llingua Asturiana y Gallego-asturiana cola entrada de la Llei Orgánica pa la Meyora de la Calidá Educativa (LOMCE). Queda agora la dulda de la postura que vaya caltener la conseyera socialista Ana González, qu’a la hora d’anunciar l’alcuerdu col ministru José Ignacio Wert pa salvar la so sobrevivencia nel sistema educativu apostaba por situar l’asignatura como optativa en Primaria en cuenta de voluntaria, al igual qu’asocede en Secundaria y Bachilleratu, lo que llevaría al idioma a competir con otres materies.

Dende’l sindicatu educativu consideren que “ye'l momentu de facer una  promoción real del asturianu aplicando la Llei d'Usu, una llei que, por cierto, malpenes afita un  mínimu dignu pa un patrimoniu d’esta importancia”. “Nesti contestu de cambios normativos preséntasenos  la oportunidá de dexar claro qué ye lo que queremos y ello ye una política que ponga al asturianu onde-y correspuende dientro del  sistema educativu. Si tien qu’haber una alternativa, qu’ésta seya curricular, que la so presencia se  faiga ‘oficial’ tamién n’Infantil y qu’enfilemos hacia’l so establecimientu como llingua vehicular na  enseñanza”, demanden dende SUATEA, qu’anuncia que va continuar coles movilizaciones y que sigue considerando la oficialidá como solución a los problemes qu’atopa l’asignatura y como garantía del so futuru.

Otra manera, l’Asamblea de Docentes de Llingua Asturiana tien convocada una concentración na uviedina Escandalera “pa desixir que la reforma educativa nun precarice tovía más el nuestru idioma”. Ésta va tener llugar el xueves a les 18.30 hores.

 

Contador Estadistiques