El temporal dexa 1.100.000 euros de daños n’Asturies

La conseyera d'Alministraciones Públiques y vocera del Gobiernu, Ana Rosa Migoya, cifró esti miércoles en 1.100.00 euros los daños totales causaos pol temporal d’estos últmos díes n’Asturies.

400.000 euros seríen los de daños causaos en puertos asturianos y en 700.000 euros los causaos nes carreteres de titularidá asturiana.
  
"Esta ye la primer valoración que se fizo de los daños en bienes de titularidá del Principáu y poro éstes van ser les actuaciones que s'executen agora colos recursos disponibles. Amás hai otros daños que yá pertenecen a l'Alministración central, como los causaos en paseos marítimos y demás", dixo Migoya en rueda prensa posterior al conseyu de Gobiernu. 
  
Indicó que cuando hai acontecimientos de naturaleza catastrófica con consecuencies estraordinaries toma midíes estraordinaries, como foi nel casu del temporal del pasáu mes de xunu, pero destacó que nesti casu hai estrozos en bienes públicos qu'afecten a distintes  alministraciones y organismos públicos pero nun tienen conocencia de consecuencies catastrófiques en bienes privaos.
  
Calcó en que "nengún gobiernu pue evitar que llueva" y recordó que yá pidieron a la Confederación Hidrográfica del Cantábricu mayor axilidá nes actuaciones de puntos concretos con problemes alcontraos.